唔少本港富二、三代已經加入家族企業工作，財爺曾俊華亦明白佢哋係本港經濟嘅新動力，上星期五就帶埋一班富二、三代北上前海參觀，同場亦有深圳市委田夫等陪同。
財爺噚日喺網誌披露今次活動，出席嘅包括信置（083）太子爺黃永光與細佬黃永耀、遠東系創辦人邱德根孫女邱詠筠、合和實業（054）太子爺胡文新，富豪（078）太子女羅寶文、仲有瑞房（272）太子女羅寶瑜等，全部都係三、四十歲左右。
財爺又提到，回顧香港嘅發展歷史，唔同年代嘅企業家，一直擔當經濟向前發展嘅領頭羊，佢希望年輕一輩可以喺經濟發展中搵到定位，超越過去偏重地產發展或者代工生產等傳統營運手法。
不過話時話，最近高調咗，又辭去華置（127）行政總裁嘅太子爺劉鳴煒，點解唔見影嘅？