民建聯噚日搞個活動，介紹首次參選嘅候選人，當中包括在深水埗麗閣選區挑戰民協馮檢基嘅「小花」陳穎欣（圖）。民建聯同工聯會已逐步分家，候選人要二擇其一，唔會頂兩個牌頭參選，不過建制派明顯要全力攻陷馮嘅票倉，先至畀陳穎欣以民建聯加埋工聯會嘅牌頭去參選。
講番個活動，所有出席者，由黨主席、到候選人以至司儀都有着上民建聯嘅黨背心，唯獨陳着上粉紅外套上台，搶鏡之餘亦顯得格格不入。佢事後解釋，唔係專登唔着黨背心，只係咁啱洗咗未乾喎。
民建聯噚日仲搵鍾樹根教新人上位之道，佢當年選立法會嘅「係時候升級」宣傳橫額被瘋傳，兼被嘲笑似豐胸廣告，不過睇嚟佢覺得呢個宣傳好成功，噚日再以此口號鼓勵一眾新人。麗閣候選人仲有黃仲棋；鍾參選嘅漁灣選區候選人則仲有徐子見。