仲有兩星期就係區議會選舉，公民力量（公記）噚日搞造勢大會，搵咗「梁粉」肥媽Maria Cordero（圖右）嚟站台，為一眾候選人打氣。2011年肥媽一開始就為梁振英站台，最終梁振英勝出選舉，其後肥媽亦喺雨傘運動期間大力撐警，呢個「挺梁撐警」嘅身份，難怪已經同新民黨合併嘅公民力量會搵肥媽啦，葉劉同佢同台，亦擦晒鞋稱肥媽係「著名影視藝人」，唔知大家有幾同意呢？
今次區議會選舉係新民黨與公民力量合併後嘅首次選舉，合併對公民力量有冇得益，過咗今次選舉就知。造勢大會嘅新聞稿，題為「公民力量造勢大會，新民黨全力支持」，其實公民力量「入贅」咗新民黨，呢個題似乎反映公民力量想喺葉劉面前仲想「振夫綱」。