股神投資旗艦第三季盈利創新高，不過畢菲特十大持倉股票跌到一仆一碌，國際商業機器（IBM）今年首三季已令巴郡賬面蝕20億美元。股神寧願坐貨唔走，堅持無意沽貨，認為買IBM屬長期投資，睇好股價回升。IBM績差股價低迷，市場有人話畢菲特揸得太耐係時候要走。畢菲特推崇長期投資被市場懷疑並非首次，2000年科網熱，股市雞犬皆升，股神對科網股耍手擰頭，重申「自己不熟悉嘅股票唔買」。
IBM最新季績差，營收連跌14季，股價近日徘徊52周低位，年內累跌13%。IBM上周五報138.25美元，相比股神買入平均價172美元折讓兩成， 難怪市場對IBM冇信心。
但畢菲特不着重眼前虧，唔理市場雜音，謹守投資法則。股神都講過股票越跌越買，IBM目前市盈率不足10倍，相對其他科網龍頭例如蘋果公司的14倍、涉獵雲端運算嘅亞馬遜955倍，IBM其實相當抵，亦跟股神一向避開估值偏高嘅科技股投資手法一致。有別其他科網股派息偏低，IBM向來派息穩定，未來12個月派息率更見3.7厘，仲穩陣過美國10年、30年期長債債息，明白股神點解唔願沽貨走人。
微軟同樣擁有類似嘅條件股神都唔吼，原因只得一個，就係股神相信就算錢再多，呢世都買唔到佢同蓋茨嘅友誼。
C+B
本欄逢周一刊出