有「娛樂大亨」之稱嘅林建岳識飲識食，旗下有多間餐廳，上星期《米芝蓮指南香港澳門2016》出爐，佢就有5間餐廳摘星，最近佢呢個飲食王國又多一位新成員，佢喺中環開咗一間專食靚牛扒嘅Beefbar。
岳少旗下餐廳種類多，有意大利菜、日本菜、中菜，上月底低調開業嘅Beefbar，總店位於摩納哥蒙地卡羅。聞說岳少經朋友介紹，飛過總店試，覺得唔錯就搵對方合作，取得專營權在港開店。
喺蒙地卡羅嘅Beefbar原先只係肉類入口廠，好多顧客成日叫老闆介紹食牛扒嘅餐廳，老闆於是開埋餐廳，𠵱家喺莫斯科、墨西哥都有餐廳。
牛扒以Staub鑄鐵鍋盛載
岳少呢間Beefbar上月底先至開業，華華上星期去食晏，餐廳位於一幢商廈嘅2樓，全層有5,000平方呎，設有90個座位，有兩個房可以作私人聚會。
打開餐牌，有分別來自澳洲與美國嘅牛，可選擇不同部位、不同飼料養嘅，鍾意食牛嘅人應該好啱口胃。
華華叫咗一客澳洲和牛午市套餐（前菜連主菜330元），牛肉的確嫩口，餐廳希望保持食物溫度，用法國Staub鑄鐵鍋盛載牛扒，真係要小心燙手。華華並非愛肉之人，反而更欣賞旁邊嘅薯蓉，廚師用歐洲薯仔加牛油、牛奶，打得十分細滑。
李華華
mailto:[email protected]
