股評人陳永陸（陸叔）今年初替港產陀飛輪品牌萬希泉設計咗一批牛錶，當時陸叔已諗好，有需要時就拎啲出嚟拍賣，上星期佢就喺香港股票分析師協會拎咗隻鑽石版牛錶出嚟拍賣，底價5萬元，竟吸引「金牌莊家」詹培忠位公子詹劍崙，與華夏動漫（1566）主席庄向松爭相競投，每口一萬元，叫到28.8萬元，由庄向松投得。
噚日陸叔講番呢件事，都話現場競投得相當激烈，佢當日先至認識庄向松，估唔到對方咁畀面！佢指，普通版牛錶（每隻4.28萬元）由今年5月，賣到6月中股市開始跌，總共賣出199隻，之後佢喺9月底推出鑽石版（每隻8.68萬元），個市就慢慢升番，佢打趣話，希望股市好似慢牛，慢慢一路升番上去咁話。