政務司司長林鄭月娥政改否決後靜咗一排，最近又好活躍，除咗繼續其好打得本色，之前係鉛水事件向泛民挑機，今日佢又會去深圳，出席由深圳市政府主辦嘅前海年度會議，難免令政界中人猜測林鄭咁積極，係咪改變主意，想為下屆特首熱身？
再加埋江湖盛傳，國務院港澳辦主任王光亞早前已經抵達深圳，更加令人猜測林鄭係咪有機會秘密見京官。其實上星期政圈已流傳王光亞去咗深圳，做乜當然冇人知，但離唔開係秘密見人，咁啱財政司司長曾俊華噚日喺網誌自爆，原來上星期五又同一班富二代去前海，兩個司長前後腳去前海，而王光亞又傳係深圳，自然政圈好多好事之徒猜測係咪有景轟？不過又有人同八方講番，王光亞留喺深圳時間其實唔長，可能兩位司長上去前海嘅時候，佢已經走咗囉！