隔牆有耳：
禮賓府開放日　CY吼實小朋友 - 李八方

特首梁振英官邸禮賓府噚日開放日，雖然就撞唔正府內名花杜鵑嘅花期，但仍有唔少人喺門口等10點入場，有內地遊客仲8點幾嚟排隊。比起3月嗰次開放日，今次保安寬鬆咗，社運人士「女長毛」雷玉蓮成功帶黃遮入場，仲舉住邊行邊叫「梁振英下台」。
蓮姐一走，CY就同梁太唐青儀孖住出巡，要警察同民安隊開路，由2樓落後花園行個圈，專揀小朋友傾偈同握手，問埋啲冇乜營養嘅好似「你幾多歲」、「屋企排第幾」等問題，有小妹妹唔領情一度縮手。佢行咗15分鐘就上番樓，其間冇回應記者。

大晒調理農務成果

而最近CY處女下海玩facebook，貼相晒自己調理農務嘅成果，趁開放日仲整個「禮賓府農作物」專區，由紅肉火龍果至秋葵，樣樣放一盆，晒冷咁款。臨到下晝5點閂門前，嶺大校長鄭國漢同老婆突現身，話只係賞花，事前冇通知CY，亦唔見面。