去年銀袋日由文家良與巫斯義合作憑「特務飛龍」食頭糊，事隔一年，巫斯義做咗文廐主帥，而這天賽果好似時光倒流咁！先係文家良在頭場由黃皓楠勝出「旅英駿爵」，到了第七場四班1400米，巫斯義亦執唔輸，重新接手波士旗下的大熱門「有鬥志」即贏，個人於停賽三個賽日前贏馬作補償，此駒單Win派33元，組合獨贏A2則派19元，亦係這天首次開出A2呢個隔夜半熱門組合。
相對倒霉嘅又係潘頓，上次「有鬥志」因巫斯義停賽而由佢操刀，結果搏失跑第三，呢場佢同大摩破冰，相隔近兩年重新合作，接手上仗由郭能跑第二的摩廐馬「八心之煌」，拉士沿內欄如狼似虎追上，走位留放等發揮已一絕，但可惜追唔切又係第二，而令佢贏唔到馬嘅正正就係「有鬥志」。
今場跑第三係換雷神的「但求上舖」，此駒由郭能騎開，換言之由三匹換人馬包辦三重彩，第四名是梁家俊的「育成寶貝」，四重彩派一萬九千幾。三T正獎有人中，每注派三萬八千幾。