張立基今年7月飽受喪母之痛，到9月佢懷孕5個月嘅圈外女友Fiona又不幸小產，真係雙重打擊。痛失BB嘅Fiona，一直休養調理身體，直至前晚終於現身，同未婚夫張立基一齊出席中環夜店Club VIP嘅開幕禮，着住黑色短裙嘅佢，精神相當唔錯。噚日問張立基Fiona身體𠵱家點樣，佢透過WhatsApp話：「佢冇乜嘢，有心有心，OKOK。」原來噚日張立基同Fiona去咗外地旅行散心，但問佢去邊時，佢故作神秘咁話：「在地球某個角落。」
Yumi逼到唞大氣
前晚出席夜店開幕嘅仲有尹蓁晞（Yumi）、寸嘴芭比夏尉喻、仙樂都等等。Yumi着住deep V貼身裙谷胸上陣，身形脹咗成個碼。Yumi接受記者訪問時唞晒大氣，問佢係咪件衫太貼身，Yumi就話：「有少少唞唔到氣，條裙上年買，嗰時身材冇咁豐滿。」問佢怕唔怕瘦咗之後上圍都縮水，佢就話寧願瘦啲喎。前晚寸嘴芭比都大晒佢36G身材，但就見佢心口有好多紅色粒粒，相當礙眼。
撰文：馮仁昭