港交所（388）與證監會有時會喺個別事情上角力，最明顯就係同股同權，不過私底下佢哋都有聯誼活動嘅，好似上周五晚，佢哋就喺金鐘租場打籃球，聯同金管局與積金局，嚟個「監管盃籃球比賽」，港交所最終砌低證監贏得冠軍。
港交所透過微信「香港交易所脈搏」公眾號披露呢場大戰，港交所行政總裁（CEO）李小加與證監會CEO歐達禮「跳波（jump ball）」主持開賽儀式，兩位着住恤衫西褲、加對皮鞋互相過招10分鐘㖭。
呢個「監管盃」約有十年歷史，除咗港交所、證監會，金管局總裁陳德霖同佢喺積金局做行政總監嘅太太陳唐芷青，亦有到場睇波。最終港交所隊贏咗冠軍，有球員仲奪「得分王」與「助攻王」兩個獎。