32歲本地騎師黎海榮，上季煞科日騎沈集成馬房之「知道勝」未盡全力仍得季軍，騎法令人嘩然，如果落力啲跑，贏埋都唔奇，結果黎海榮當然衰咗，被重罰停賽十四個賽日，上月底才復出，至今仍未開齋，季內策騎費連獎金得兩萬一蚊左右收入，即係7月12日唞暑後至今約四個月，平均每個月只得五千蚊落袋，唔慘就假咯！
今期榮仔座騎仍唔多，只得5隻，最值得睇好應係第7場四班1400米之「踏雪無痕」，呢匹馬及退役同主馬「超晒班」各贏一場，都係由榮仔經手，可以話係馬主愛將。尤其「超晒班」勝出嗰次，直路冇耐馬鞍滑移，榮仔冒住生命危險，頂到返嚟擊敗對手，咁幫得手，馬主梗係錫晒佢啦。
講番「踏雪無痕」，上季1400米一放到底贏馬後，再出保持水準得季軍，只係輸畀高質頭馬「大運舞台」一個頭位，「大運舞台」最近再贏加到74分，而「踏雪無痕」家陣只44分，擺明好着數。
榮仔季初停賽期間，幾乎每朝都操住「踏雪無痕」，用私家褓姆來形容，一點都不過份。早喺10月上旬，此駒已試大閘勝出，早有作戰水準，一直唔跑就係因為刻意等埋榮仔復出，睇嚟佢係時候轉運咯！