最近嘅電影都「大懷舊」，又咁蹺幾套都回到1992年，咁92年究竟有乜咁特別呢？
英超出世。英超聯正式成立，聯賽脫離足總控制，全面擁抱商業化，配合啱啱出世嘅收費電視台一齊起飛。當年海外轉播費每年脆脆地百幾萬英鎊，如今變成每年超過三億英鎊，升幅高過蘋果股票；今時今日，一個英超主宰好多電視台嘅生死。
紅館踢波。當年五月，香港舉行咗第二屆世界盃室內五人足球賽，香港喺分組賽贏到場尼日利亞，開心死班fans，仲令到香港興咗一排五人賽㗎。結果巴西正路攞冠軍，山度士就踢到識飛，叻到有歐洲球隊邀請佢加盟踢職業波，可惜佢傷咗去唔到，遺憾過《哪一天我們會飛》嘅余鳳芝。
東方王朝。92至93球季嘅上半季，東方創下「三零部隊」紀錄，零輸零和零失球；前無古人，到今日亦後無來者。當年嘅鋼門希福特上年去世。
奉旨夜蒲。歐洲冠軍球會盃玩完，改名兼改制變為今時今日有主題曲嘅歐聯，從此亞洲時區麻甩佬平日深夜多咗個夜蒲理由。最後一屆歐冠盃冠軍係巴塞，順利過渡威到今日。同年彭定康宣誓就任港督，曾鈺成成立民建聯。英式長傳vs地面組織。
夢想遺產。呢年奧運喺巴塞隆拿舉行，焦點係只此一隊嘅「夢之隊」，之後每屆再出現嘅夢二三四五六七都只係焗住繼續拍嘅續集。12個成員，講唔到10個唔好叫自己做籃球迷。
黑手初現。白禮達左右手布萊澤最近爆料，原來92年開始佢哋已經行賄其他FIFA成員，想控制98年世盃主辦權，結果98年由法國主辦。諗番轉頭，大哨決賽臨場失準，唔知關唔關佢哋事。
92年，係幾搞嘢。
KEYMAN
節目主持