品味嘅嘢，真係好見仁見智。可能唔少NBA球迷上周六朝早起身，睇溜馬主場對熱火嘅常規賽直播，點知發覺着紅衫嘅竟然唔係熱火，不過溜馬件衫又好似怪怪地，心口印住「HICKORY」字樣，原來呢件復刻衫，係紀念真人真事電影《Hoosiers》上映30周年，而且題材嚟自印州一間高中嘅奮鬥史，係就係好勵志，不過件衫就肉酸啲囉。
紅衫襯金褲夠晒重口味
電影同北美運動聯乘都唔係新鮮事，好似電影《回到未來2》講男主角去到2015年10月，不經不覺大家都過咗呢一日，除咗電影預言嘅新發明好似自動波鞋、3D眼鏡外，仲預言MLB弱旅芝加哥小熊拎到總冠軍。
溜馬上周五主場對熱火件復刻衫都同電影有關，係紀念電影《Hoosiers》上映將踏入30周年。呢套電影1986年上映，同籃球以及印弟安納州都有關，故事就係50年代一間叫Milan嘅高中，克服規模、資源都及唔上對手，但結果以19勝2負成功取得54年州冠軍。講起面對逆境，溜馬前鋒保羅佐治（Paul George）都係表表者；PG上季成季受傷，溜馬亦都緣盡季後賽，今季捲土重來再現全能前鋒本色，今仗獨取36分，幫溜馬90:87擊敗熱火。不過致敬還致敬，紅衫襯金褲，搞到成罐午餐肉咁，似乎重口味咗啲喎。
其實NBA搞咁多花臣，又新波衫又復刻版之類，無非都係想引啲球迷買多幾件，好似快艇今季就轉logo，大條道理出過晒新波衫，上周六主場對火箭嘅上季西岸準決賽戲碼，快艇就首次着全新黑衫應戰，唔知又會唔會帶嚟好運呢？
