真正嘅型男係經得起歲月嘅考驗，就好似就嚟八張嘢嘅「四哥」謝賢，仲有一種型男嘅氣質喺度；而喺球壇之中，66歲嘅阿仙奴領隊雲格雖然頭髮白晒、皺紋亦唔少，但舉手投足之間，散發住四分智慧、三分成熟、兩分儒雅、一分瀟灑、再加少少憂鬱嘅氣質，簡直成個模特兒咁。
教波擺Pose一樣掂
法國《隊報》搵雲格做訪問，唔算係乜新聞，但《隊報》嘅編輯就好有心思，幫雲格影咗輯型到震嘅靚相！大家睇吓呢張，身高1米91、天生一副模特兒身材嘅雲格，着住大褸、襯條頸巾喺海邊度行。見佢眉頭深鎖，眼放遠方，海嘅另一邊彷彿係亨利、伯金昔日喺高貝利嘅幕幕情景，嗰種憂鬱味就淡淡咁散發出嚟。
仲有一張亦係不得了，雲格西裝筆挺，企喺酒吧枱邊，側面對鏡頭，搖住紅酒杯，低頭沉思，好似憶起以往同費格遜賽後飲紅酒嘅惺惺相惜，白髮與皺紋訴說逝去嘅年華，充滿滄桑感。睇睇吓，我求大俠都被雲格嗰種文藝所感染，由大俠變咗做文青。
一路睇相，一路品味雲格充滿智慧嘅訪問，真係一種享受，佢話：「上天賦予人不同嘅才能，我嘅角色係一個引導者，幫助球員尋找上天賜佢哋嘅寶庫。我冇創造任何嘢，我只係將每個球員潛在美好嘅一面發掘出嚟。我係一個樂觀派，一直以嚟，我都為發掘美好而不遺餘力。旁人睇唔穿，可能認為我太天真幼稚，但我就越嚟越堅信我所信嘅係正確。」我求大俠仲以為邊個哲學家嘅訪問，唔係，雲格本身係一個足球哲學家，一直用行動實踐佢嘅華麗足球思想。寫到呢度，真係想跪拜一次「雲爺爺」。
納比尹馬維克拍得住雲格
除咗喺高登人稱「雲爺爺」嘅雲格外，球壇都有唔少型格老帥，就好似之前教廣州恒大嘅意大利名帥納比，佢老人家都67歲，但一頭銀絲如月影，仲有一對炯炯有神嘅利目，真不負「銀狐」嘅外號。仲記得納比有張食雪茄嘅相，佢喺煙霧中散發王者氣派。數後生少少嘅有前荷蘭教練、𠵱家教緊沙地阿拉伯、63歲嘅尹馬維克。雖然佢教波唔算好掂，但身形仲好fit，非常有型。