梁振英成日講香港有一個角色扮演，就係超級聯繫人，究竟聯繫啲乜嘢，大把人唔明，以前內地對外航空未認真開放，香港曾宣傳自己係The Gateway To China，但至今日，上海、北京有不少直航班機往歐洲，仲多過香港，香港已失去Gateway作用，有啲朋友去歐洲啲二線城市，有時會飛去北京轉直航㖭（例如去雅典），香港做跨國公司之中國聯繫？咪講笑，最大之跨國公司紛紛在上海、北京設立中國總部，仲有乜借重香港之地方！航運方面，上海深圳已取香港地位而代之，貨櫃碼頭大過香港，做所謂「一帶一路」聯繫人？更是開玩笑，請問香港有乜學者、企業係一帶一路專家，有幾多人曾在絲綢之路國家（中亞細亞至東歐）有深厚研究、生意經驗？在海上一帶，香港素未對東盟國家有興趣，聯繫主要係靠僑鄉關係（如福建人，潮州人），連在人口最多嘅印尼，都只係計劃開設經貿辦事處，了解印尼國情，香港人有待起步。
呢日碰到一位全國人大代表，佢話對梁振英「超級聯繫人」之談，老早不以為然，梁振英以不聽別人意見著稱，講多亦無謂，佢半開玩笑咁話：「新加坡先至係超級聯繫人，竟然可以充當中間人，總統陳慶炎邀請習近平到訪，於是中國國民黨與共產黨兩位領導人可以相遇共會，昨日握手面談近一小時，再之前，1993年，李光耀曾促成台灣海基會董事長辜振甫與大陸海協會會長汪道涵於4月27日至29日在新加坡會談，國共兩次歷史性會面，皆由新加坡聯繫，直情係超級聯繫人啦。」
1945年，毛澤東到重慶見蔣介石，舉杯高呼「蔣委員長萬歲」，70年後，中華民國總統（國民黨籍）與中華人民共和國主席（共產黨總書記）在新加坡見面，主客形勢大變，雙方究竟有乜好傾？相信都係門面功夫，習近平俾面馬英九，希望有所幫助國民黨在2016年之立法院及總統選舉之形勢箒，呢樣應該係中共之主觀願望，北京最唔想見到蔡英文及民進黨掌權，但習馬會是否真的有助國民黨選情？係刺激咗台灣股市上升嘅，但同時亦刺激咗台灣大學生上街示威反習馬會，年青選民可能全部投民進黨一票。習馬會係國民黨一場賭博，私人嚟講，係馬英九想在下台前，將自己寫入歷史，對習近平而言，只是給小馬小恩小惠。習馬會之最大贏家反是新加坡，令小國成為超級聯繫人。