與金融M之午飯約會，拖拉咗近三個月，一次因為佢跌親隻腳，一次因為佢患感冒失聲，皆臨時取消，好嘞，到咗十一月食午飯之期，左丁山不知何故，成個上午都拉肚子，心知不妙，勉強到FCC睇澳洲墨爾本盃，一於捧吳嵩場，買佢與姑丈黃先生（已逝）買入嘅「快如疾風」。吳嵩事先話袋住姑丈張相片入場，如果有幸贏到墨爾本盃，就會高舉姑丈相片，拉頭馬影威水相。可惜呢，「快如疾風」抽到外檔跑三千二百米，戰術唯有爭取走入內欄跟馬（因跑道太濶，沿途跑外欄就好蝕底），因有成24隻馬參賽，「快如疾風」焗在馬群中，入直路後騎師史卓豐搵位衝上，頗有後勁，但為時已晚了。冠軍係大冷門224倍嘅「彭城貴冑」，由女騎師佩妮策騎，創155年歷史紀錄第一位女騎師捧盃，呢啲賽果，真係155年先至有一次，四重彩派二百五十九萬，發夢十次都未必會中。
一路睇馬，肚子一路唔掂，但係唔通又要缺席午飯約會？唔好嘞啩，最後都冒險搭地鐵去到堅尼地城爹核士街一間餐館，沿途經過兩三間，見到入面座位多過人，獨係呢間坐到爆棚，可見食客的眼睛是雪亮的。金融M鬼咁客氣，猛咁叫好嘢食，只是左丁山無福消受，食咗幾塊無以尚之嘅燒豬仔，已經頂唔住，悶到上喉嚨，連忙撲去洗手間，出來不敢再吃，金融M大嘆：「你冇口福咯。」唔食就傾偈啦，金融M常在中環食靚嘢，呢次點解選在堅尼地城？原來佢要在飯後返母校講書，即刻八卦之心大起，問佢「港大之恥」（借用一位專欄作家以前稱呼徐立之校長為新亞之恥），如何善後？佢頴晒頭話港大嘅法律顧問嘅意見，申請法庭禁制令，阻止傳媒發布校委會「秘密」範圍闊到離晒譜，令人莫名其妙。以佢所知，校長馬斐森隻身到港大，舉目無親，想話憑校長權力，另組管理班子，點知諸事不順，在陳文敏一事上俾校委會打壓到有氣冇碇唞，都幾氣餒，金融M驚呢位校長會提早解約鬆人，以港大今天的風波聲譽，還能招聘搵一流人才都幾艱難。次日，睇星島日報，馬斐森校長到溫哥華出席港大校友會年會，接受訪問，嘆息目前港大正處於夾縫中，大學運作有困難。咁講法，金融M之觀察冇乜大錯，港大人應團結在校長周圍，還是在校委會周圍呢？