今時今日facebook成為好多人日常生活中不能缺少一部份，官員同政客亦紛紛開fb搞軟性宣傳，成唔成功取決有幾多人like&share，特首梁振英早排都開咗，政界主戰場彷佛由立法會移師咗去「fb農場」，若果用CY個fb同田少個fb比較，就算同樣講「調理農務」，受歡迎程度明顯都差一大截。
寸政府同泛民開片致流會
其實好多人想add CY同喺佢fb留言，不過做佢朋友固然要先經篩選，唔係朋友更加冇得留言，最大問題係冇乜話題性，好似噚日佢出席綠匯學苑（舊大埔警署活化）開幕典禮，事後喺fb貼咗幾張合照，帖文簡介綠匯學苑嘅課程同培訓、烹飪訓練區等，同出新聞稿冇分別。
CY日日「調理農務」，田少都唔輸蝕，周四立法會流會後，貼咗自己喺花園「料理農務」相，仲留言抽水話，一早預咗流會，「一早都叫咗政府及保皇黨唔好下下都同泛民開片！唉，我唯（惟）有返屋企『料理農務』！」田少呢個帖有5,000幾人like、200幾人share，相比CY同日嘅自種香茅煮咖喱帖僅錄得900幾人like、40幾人share，田少真係贏幾條街！立會流會，政府固然失威，但CY連最拿手嘅農務科都輸埋畀田少，先係最冇面。
李八方
mailto:[email protected]
