【區選2015】
【本報訊】面對建制派豐厚資源及強大地區網絡，正當上一代泛民慨嘆「冇得打」之際，上屆首次參選即勝出的民主黨少壯派區議員區諾軒反而認為，建制派並非「屈機」，「只要唔犯錯，佢哋的確可以贏，但冇可能四百幾區都唔犯錯」，並指建制派有三大缺陷，只要泛民懂得應戰絕對可扭轉局面。
地區事務常犯錯
在南區利東一選區角逐連任的區諾軒，認為建制派山頭主義嚴重，不能協調適當人參選，如他是中大碩士，但其利東一選區是民建聯「勢力範圍」，偏偏民建聯只能派出學士李嘉盈應戰，「如果換做新民黨撼我，佢搵個劍橋大學嘅人出嚟其實唔難，問題係民建聯已經霸咗呢度」。部份人不顧協調機制，結果建制派今屆約有10區相撞，泛民隨時收漁人之利。
其次，他認為建制派雖然強於組織票，但做地區事務常犯錯。如2009年11月民建聯黃才立掛橫額爭取政府更換華富邨電線，但房署早在7月已承諾更換，「你見到佢哋可以做得好儍」。他指建制派為了鬥快「霸區」，倉卒間只能派一些質素參差的人落區參選。
第三個問題則是左派地區組織越幫越忙，區指建制派花心思滲透業主立案法團後卻管理不善，反令大批居民反感；協助街市重建時，左派組織只集中幫忙某幾個店主，令其他店主不滿，「此時泛民就要掌握對手嘅失誤」。
李嘉盈及黃才立拒絕接受訪問，利東一參選人尚有熱血公民黃潤基；華富北則有民主黨柴文瀚、無黨派尹杞殷和羅月華。
■記者陳建平