文家良馬房旗下的「辣得很」，將於周日（8日）第十場三班1400米上陣，如果能取得連捷，當然值得慶祝，但喺「辣得很」出賽之前，馬主黃紋兒子吳少庭和其靚靚新抱Zoe，呢日先有一件喜事，佢哋兩公婆喺中環蘭桂坊附近的泰式串燒店，呢日正式開張，Zoe一家邀請咗一班好友，包括堪輿學家麥玲玲、女馬評家心悅，以及文家良伉儷等人，擔任剪綵嘉賓，而且仲有舞獅表演，場面非常熱鬧。
Zoe雖然已經生咗一對小朋友，但佢保養得宜，仲成個少女咁嘅樣，而且佢入得廚房出得廳堂，除咗湊仔之外，據知Zoe亦係整串燒高手，不時會喺舖頭打躉，教吓啲員工整吓各樣美食。唔知大家去完蘭桂坊飲嘢，有冇興趣順便試吓Zoe嘅手勢。
吳少庭兩夫婦整串燒，可以不假手於人，但「辣得很」周日爭連捷，就要睇巫斯義點騎，上仗人馬喺同程取勝，可謂毫不吃力，隻馬潛力簡直深不可測，今次留喺三班，抽個三檔靚位，睇嚟可以好似啲串燒咁，放心再食！