皇家馬德里嘅法國前鋒賓施馬呢排真係黑到痺，因傷缺陣周二對巴黎聖日耳門等比賽外，仲要惹埋官非，涉嫌用性愛影帶向國家隊隊友華布拿勒索，周四獲法國警方保釋候查，佢亦都返到馬德里復操，好彩皇馬都雪中送炭，官方聲明力撐賓施馬。
保釋後即返皇馬操練
皇馬聲明中表示，主席佩雷斯同賓施馬見過面，堅信佢係無辜，會方會向佢提供一切協助。綜合番法國通訊社同埋法國報章嘅新聞，初步睇賓施馬都係衰做好人，其實佢本身喺皇馬已經有900萬歐元年薪，為咗15萬歐元去勒索華布拿已經唔係好有說服力，加上佢同華布拿喺國家隊都好老友。
據報事件係有歹徒得到華布拿嘅性愛影帶，想勒索呢位里昂翼鋒，透過一位賓施馬兒時老友做中間人，搵到賓施馬，希望佢傳話畀華布拿；原來賓施馬之前都衰過鹹濕，試過因為俾人捉黃腳雞而破過財，所以佢做好心叫華布拿用錢解決問題，點知法國警方一查，連賓施馬都拉埋。好彩賓施馬都黑唔晒，之前因為無牌駕駛俾西班牙警方捉到，搞到國家打吡後要出庭，𠵱家警方就撤銷控罪喎。
講開皇馬，基斯坦奴朗拿度為左下周一公映嘅自傳式電影，繼續噴口水做宣傳，今次仲講到前球會曼聯，話自己睇到紅魔鬼今時今日嘅戰績都好唔開心，仲暗示希望返去效力。而且佢自誇勁過美斯外，亦點咗未來世界球壇五大球王出嚟，除咗夏薩特、保羅普巴、尼馬呢三個大熱，仲有皇馬挪威神童馬田奧迪加特，同埋曼聯嘅迪比，嘩，C朗品味真係出眾。