教育局局長吳克儉以私人理由而唔肯去月底立法會舉行嘅TSA公聽會，俾各界猛砌。噚日局長返母校北角金文泰中學擔任校慶嘉賓，話題當然離唔開TSA，吳克儉同學生傾閒偈時，特登問學生係咪已考TSA，其中一個中四女生話自己冇操練、冇壓力，吳即好開心反問：「你唔好呃我喎！」 佢又提到金文泰中學校內四社中，其中一個係「信」社：「信係好緊要，講信用，有原則做事！」之後就同八方扯到去出席立會TSA公聽會件事。
局長再次為唔去TSA公聽會解釋，可能冇咗班議員喺度，佢今次好勇，話自己當日係冒住俾人砌嘅風險講真話︰「信係講過嘅說話要負責，唔得就唔得，冒住俾報紙、傳媒、社會人士（批評），我太過stubborn（固執），但我都話嗰段時間真係唔得！」仲暗寸立會教育事務委員會主席林大輝冇事前同佢夾時間喎！