周四上演歐霸盃分組賽，多蒙特、拿玻里、維也納迅速同莫迪都贏波，攞三分後齊齊提早兩輪賽事晉級。至於利物浦亦都全取三分，作客魯賓卡山靠小將佐敦伊比入波以1:0擊敗對手，喺B組連和三場後終於開齋，亦係紅軍近三年嚟首次喺歐戰作客贏波。
利物浦由高路普接手執教下漸入佳境，贏咗魯賓卡山之後最近已經連贏三場；亦係自2012年12月之後第一次喺歐戰作客贏到。高路普喺呢場波唔算派太多副選上陣，有半隊人都係主力嚟，而19歲翼鋒佐敦伊比就把握到上陣機會，喺52分鐘攻入全場唯一入球。繼續喺場邊充滿激情，又跳又叫嘅高路普，賽後都好滿意紅軍嘅演出，兼點名大讚伊比：「睇到班球員對勝利幾咁渴求實在美妙。伊比真係好球員嚟，有天份同埋技術亦好出眾，亦知道自己要繼續努力，學更多嘢。」
紅軍勢頭咁勁，周日英超主場對水晶宮，隨時再下一城。至於另一支英超球隊熱刺亦都贏波，喺主場以2:1險勝安德列治上榜首。