狄志遠（Dick）離開民主黨，終於可以大解放！噚日佢同傳媒茶敍，特登介紹佢第二個老婆，蝙蝠俠是也。眾所周知阿Dick係蝙蝠俠迷，辦公室入面幾個座地書櫃都放滿蝙蝠俠玩具（圖），佢仲喺牆上親筆畫個葛咸城出嚟，慳番唔少裝修費。但佢都唔係獨沽一味，當中亦有星戰同超人嘅手辦公仔、模型，名副其實「kidult」一名。
阿Dick同八方講，屋企收收埋埋有成80箱蝙蝠俠玩具，成間房都擺唔晒，要租迷你倉。佢話以前喺基督教信義會工作時，收工都會去旺角一間蝙蝠俠專門店兜個圈，放低幾嚿水，當時老婆都冇乜詐型。但今時唔同往日，佢話𠵱家冇收入，老婆叫佢慳啲使，買少件咁囉。