買渣打（2888）就等同買一隻有息派嘅新興市場股票基金無異，因為其上市至今嘅股價走勢，同MSCI新興市場指數極相似。
渣打側重新興市場，但隨着近年中國經濟放緩同商品價格疲弱，渣打業務受累，股價大跌。
雖然呢間跨國銀行表明會減少中國同印度嘅營運，不過睇番佢喺經營收入同經營溢利兩方面嘅地區分佈，就明白要減少對新興市場依賴，唔係短期內可以做到，因為佢對新興市場嘅依賴程度之深，遠超想像。
截至今年6月30日，渣打有88%經營收入都係來自大中華、南亞、東盟、中東、北非、巴基斯坦同非洲呢啲新興市場，而來自上述地區嘅經營溢利更佔其整體經營溢利約94%。
金融海嘯後渣打因押注業務重點喺新興市場，股價2010年曾重上接近海嘯前水平，惜風水輪流轉。
隨住經濟周期更替，新興市場由盛轉衰，成熟市場逐漸復原，昔日優勢成今日劣勢。
海嘯後有分析指成熟市場出事原因係槓桿過度，但新興市場企業近年一樣過度借貸，美國加息料致渣打資產質素惡化，連同中國經濟放緩，就算渣打唔再大跌，股東都好難指望佢大升。
睇返渣打上市至今幅周線圖，股價支持位喺66元左右，同昨日收市價79.8元比較，仲有兩成下跌空間。始終渣打現價已較2010年高位蒸發咗三分之二，一定程度上已反映市場對佢前景嘅憂慮，相信其股價距離見底唔會太遠，但正如大行里昂所言，渣打正處於長期寒冬，筆者估有排先上得返100蚊。
El.
本欄逢周二、四、五刊出