教育局局長吳克儉日前以休假為由，寧願遊埠表明唔會出席立法會教育事務委員會喺29號舉行嘅全港性系統評估(TSA)公聽會。
吳得掂呢個決定辣㷫唔少家長，亦令議員嬲到紮紮跳，身為委員會主席嘅工業界林大輝（圖）話呀，聽到呢個答案後「好激氣」，相信吳得掂若唔出席，對成個公聽會嘅結果打咗折扣。
林大輝強調唔會因為吳得掂而改期，皆因籌備一個公聽會要花好多人力物力，亦好難遷就所有人嘅時間。
大師喺港台節目《千禧年代》話 ，相信公聽會屆時會爆場，因為好多家長同辦學團體都想見到吳得掂，聽佢親自解釋，若吳缺席，當然令與會者「大失所望」。
提到吳得掂聲稱「好想來」，大師話喎，唔會判斷佢想唔想嚟，「但如果真係想嚟，時間係由佢安排嘅」。