強積金（MPF）港股基金年初至今蝕1.45%，唔算入肉，不過問題係莫講話年初至今，就算睇返最近五年，都有唔少MPF港股基金負回報。
最標青嘅港股基金——永明首域強積金香港股票基金，最近五年嘅年度化回報得3%左右，跑輸通脹。根據晨星嘅資料，呢隻期內表現最好嘅港股基金，喺全港522隻MPF基金中只排第74位。
全港522隻MPF基金中，以最近五年嘅年度化回報比較，表現排頭幾位嘅係健康護理基金、北美同純美國股票基金，佢哋嘅年度化回報全部高於一成，遠跑贏港股。
同身邊啲朋友講起MPF，都會發覺佢哋偏好揀港股基金。冇人估到其他股票基金之後仲有冇得升，但隨住中國經濟放緩，中港或大中華股票基金，未來幾年表現唔係咁好係意料中事，將新MPF供款分散至唔同地域或資產類別嘅基金，似乎更有必要。
所以透過半自由行轉換基金受託人時，除咗要考慮基金表現同收費外，建議留意埋個受託人有幾多款基金畀你揀。好似MPF日股基金咁，全港得4個MPF受託人有提供，如果受託人唔係呢幾間，就算睇好日股都冇得買。
El.
本欄逢周二、四、五刊出