身為一個廢青，經常流連各大討論區同面書是常識吧，小弟近日就睇到一單幾好笑嘅新聞，話說一位香港打工仔放大假期間，就收到老闆WhatsApp留言，叫佢拍硬檔即晚趕好份報告，又簡單又多時間，面對呢個咁合情合理嘅要求，個打工仔竟然一口拒絕咗老闆，仲話放緊大假係私人時間云云，但發惡過後又好擔心俾老闆秋後算賬，擔心連份工都冇埋。
唔捱得就係今時今日6、70後，對待8、90後嘅批評，不過其實6、70後都唔係好辛苦箒，最多都係一家八口住係200呎公屋，或者一磚腐乳要全家當餸食，到佢哋老竇阿爺講番以前打日本仔有幾咁辛苦，佢哋咪又係講句時代唔同。
90後一定係又懶又唔願捱嘅廢青？阿仙奴翼衞比利連（左）就一定唔係。上仗聯賽作客史雲斯，對廠迷最印象深刻未必係銀河唯一先開紀錄，或者哥斯尼爭議入球，係比利連上下半場一次精采防守表現，上半場史雲斯前鋒巴菲迪比高美斯單刀，懶係高章想扭過施治，比利連就好似電兔咁鏟走高美斯腳下球；下半場就輪到佢飛身護空門，結果重要部位撞到門柱，真係隔住個芒都覺得痛。雖然已經判越位，比利連救唔救到都冇所謂，不過佢嘅奮勇精神，真係拍得住梁烈唯。
好似曼聯不可以沒有嘅90後迪基亞一樣，阿仙奴一樣唔可以冇咗95年出世嘅比利連，迪保治，sorry，真係只可以做後備。
文：牽牛