財爺曾俊華同佢頂頭上司特首梁振英，喺理財哲學方面向來南轅北轍，一個俾人話係孤寒財主，一個就搏命使錢。鬍鬚曾噚晚出席獅子山學會晚宴時，演詞再證明呢點。
佢話，應該將政府對經濟嘅干預減至最低，市場失效先出手，使錢要諗過度過，唔好使到政府負債，令下一代為上一代還債，同時提到政府只需要提供必須服務，同埋發展基建，維持小政府先可以令到稅制簡單。
佢指，香港公司報稅只需用78小時就搞掂，相比起全世界嘅公司平均要用264小時真係少好多，仲講笑話，自己只須5分鐘就報完稅，「可能因為同我收入有關。（因他只按標準稅率繳稅）」
雖然香港每年尚有盈餘，但由於政府支出不斷增加、人口老化令福利支出上升，工作人口將於2018年開始下跌，所以佢話，唔好亂咁使錢。