區域法院上周開始審理原居民涉收錢非法賣丁權案，控方話鄉議局前主席劉皇發（圖）係控方證人。記者日等夜等未等到發叔出庭，原來佢抱恙留院，控方噚日呈遞浸會醫院「10月3日」發出嘅醫生信，內容話佢上月27日入咗院，未知幾時出院，月底再評估。控辯雙方終決定「唔等發叔」，繼續審訊，唔使麻煩佢老人家出庭喎。
控方解釋，相信封醫生信日期係院方擺烏龍打錯，應該係11月3日發出，辯方大狀原先想續等發叔出庭作供，但法官沈小民就話：「我睇唔到劉皇發嘅口供對本案有乜直接關係噃！」
八方上月底都收過讀者報料話發叔入院做大手術，佢兒子、即係𠵱家嘅鄉議局主席劉業強當時強調老竇出咗院。控辯雙方噚日以私隱為由拒絕透露發叔病況，有傳發叔術後出過院，有官員仲去過佢屋企探佢，但近日又入咗院喎。