「嘩鬼」梁齊昕大鬧蘭桂坊，仲連摑母親梁唐青儀，唔少人都同情梁太。有個寶貝女嘅葉劉淑儀就話「家家有本難念的經」，唔評論齊昕事件，但就唔介意分享吓湊女經，強調親子關係要花時間經營，阿女從未試過對佢不敬。
睇書增進親子關係
葉劉淑儀同女兒Cynthia形影不離，八方問佢有乜辦法搞到個女咁聽話？佢話Cynthia都曾經歷反叛期兼attention seeking；以前自己係工作狂，母女關係都經歷過低潮，中學時老師仲話Cynthia過度活躍，兩人關係直至葉太2003年下台去美國讀書先改善。
葉太話同個女一樣鍾意睇書，尤其係睇政治書，閱後互相分享，都係母女建立融洽關係嘅方法。佢坦言，女兒未試過飲醉酒後對佢不敬，細細個亦有去哈囉喂活動，但大個就冇咯。咁佢有冇同阿女一齊扮鬼應節？葉太笑稱自己太老喇，唔玩得咁激。