今明兩年分別有區議會同立法會選舉，各大政黨忙到甩轆，獨立人士亦磨拳擦掌，睇準各界形勢部署出戰，好似新一屆立法會選舉，港島區將減少一席，令原本已經爭崩頭嘅局面，更加混亂。花生友聽聞，有位仁兄打算湊熱鬧，想喺港島區突圍而出，就係人稱「金勞詹」嘅前金融服務界立法會議員詹培忠喇。
政界一直傳聞，金勞詹依舊雄心壯志，想重出江湖做立法會議員，而港島區則係佢考慮出戰嘅選區。至於信心何來？有花生友笑笑口話，可能佢係想放風試吓水溫，睇吓各界反應啫。
受惠於曾鈺成退下火線
有政界中人透露，金勞詹認真評估過，認定自己有勝算喎，聽講佢推斷新民黨主席葉劉淑儀劍指下屆特首，而2017年特首選舉同立法會選舉只差半年左右，對方可能會棄選立法會；加上民建聯創黨主席曾鈺成鐵定退下火線，如果該黨派出鍾樹根搭張國鈞呢個組合，要拎番兩席點會咁易？
咁嘅形勢下，金勞詹或有機會攞到唔少建制選票。呢位知情者仲笑言，呢排掀起港隊足球熱，佢身為港隊名譽團長，可能吸到唔少球迷票，其他有意參選嘅人恨唔到。
花生友噚日打畀金勞詹，佢話一切言之尚早，自言「有時講吓笑箒」，又話仲有好多時間考慮，𠵱家講多無謂，分分鐘俾人計佢選舉經費㖭呀。
花生友
周二、四刊出