星級飲食指南《米芝蓮指南》今日公佈2016年香港區入選名單，餐館上榜固然是一種榮譽，但「上咗神檯」也可以被打回凡間，一切都考驗著餐館對「食」的拿捏。去年開業僅4個月便「摘星」的甘牌燒鵝，不只有米芝蓮的加持，更背負了馳名燒鵝酒家鏞記第三代傳人的光環。老闆甘崇轅對餐廳能否「冧莊」看得豁達，「冇（星）嘅話，都要繼續落去架。」因為經營燒味店的原始動力，來自那份守護甘家飲食傳統的精神。
記者：袁楚雙
米芝蓮將甘牌燒鵝的名氣遠播至地球另一端，連北歐、美加的客人也越洋親嘗燒鵝滋味。甘崇轅說，餐廳只可容納約40名顧客，開業一年多以來遊客比例不斷上升，由最初僅2成是旅客，上升至現時約3、4成，反映米芝蓮的威力，「好多未聽過我哋（指鏞記背景）嘅人，都會專門嚟我哋舖頭食嘢。」
慕名而來，吃的當然是招牌甘家燒鵝，店舖使用體型較小的黑鬃鵝，師傅早上7時許回到店內準備，由清洗、風乾、醃製、燒烤至成品，歷時4小時，每朝11時半新鮮出爐，燒鵝絕不過夜以保證嘗味品質；另一鎮店之寶「肥燶叉燒」更是祖父輩留下來的獨門佳品，由「肥、瘦、肥」三層豬腩肉交織而成，入口爽脆不膩，以往只有熟客專享，甘祟轅將之大眾化，搬上餐牌與食客分享味蕾上的快樂。
親身到訪店內，或許會更明白甘牌奪星之路不止如此，甘崇轅憶述，爺爺甘穗煇當年「斬燒鵝」會一眼關七，先看清楚客人何方神聖才落刀斬料，「老人家、細路仔梗係食冇骨、稔啲，女士鍾意食瘦啲，男人通常都食啖啖肉。某類客人一定係食某啲嘢。好老實，佢哋食得開心，換嘅機會都細啲。」
地方小客人多，甘崇轅依然希望延續爺爺的飲食理念，付出多一點關懷，盡量滿足每個客人的需求，維持甘家所著重的「客情」，「做飲食要留意客人嘅反應，上咗菜係即刻影相？定停晒手？咁咪行埋去問吓佢有咩需要。」他慢慢從食物打開與客人的話匣子，更遇上見證過甘家三代變遷的老顧客，「以前係我爸爸serve過佢，而家到我serve佢，感覺好特別！」
雖然名利雙收，難得的是甘崇轅看得豁達，「得唔得到（米芝蓮）已經唔係我哋可以控制到。」他笑言對今年榜單持平常心面對，「當然有都係好嘅！」象徵了對甘牌燒鵝台前幕後的一份肯定。萬一沒有獲獎呢？他輕鬆答道：「會唔會因為咩令店舖唔得呢？呢個都係一個反思嘅機會。」