百年老店先施（244）為省靚招牌，吸引多啲後生仔幫襯，搵來名模樂基兒（Gaile）做代言人，佢除咗幫先施拍廣告之外，早前仲去咗法國等歐洲國家拍攝真人show，先施主席馬景煊亦跟埋去監場。
先施早前安排Gaile去咗歐洲兩個星期拍攝真人show，馬景煊噚日出席發佈時透露，自己跟咗去10日左右，不過佢都唔係跟到足，好似有朝晨早6點，佢未起床，大隊就已經去咗拍攝。
佢當然唔肯透露Gaile袋幾多代言費喇，只係話價錢合理，大讚對方又靚又勤力。
面對本港零售業疲弱，馬景煊都話，幾間先施嘅生意都麻麻，除咗搵名模做代言人，希望飛甩老土形象之後，佢話明年中開始都要搵業主傾減租，希望減到兩、三成租幫補生意。