喺上個月4號為法籍老公Domingo剖腹誕下6.7磅混血男B嘅官恩娜（Ella），之前只係貼過囝囝腳仔相，噚日趁住囝囝滿月，佢終於公佈囝囝相兼代仔留言話：「大家好！我是Gabriel-Antonio Maurellet，今天是我滿月的大日子！很高興和大家見面！」
「人生最幸福快樂」
睇見Ella抱住囝囝鼻尖對鼻尖張相，感受到佢好滿足做媽咪，囝囝個樣睇落亦都好似Ella。講到坐月兼湊B嘅生活，餵母乳嘅Ella話用晒啲時間湊仔，冇機會更新近況：「堅持埋身餵哺母乳因為我想將最好嘅畀BéBé G ！而且嗰種親密嘅肌膚接觸同心靈交流係好難有嘢可以取替（代）！」Ella又話餵母乳其實比起以前拍戲更攰，但佢見到囝囝食飽飽好滿足，仍然覺得好有價值：「最重要係佢可以吸收到我嘅抗體，更加健康強壯！我真係好鍾意成為媽咪嘅感覺！ 絕對係我人生到呢一刻為止最幸福快樂嘅事！將來諗番同BéBé G並肩作戰嘅日子，一定會係好甜蜜嘅回憶！」
撰文：馮仁昭
