每年年頭、年尾樂壇都有頒獎禮，港交所（388）為慶祝「滬港通」開通一周年，亦諗出幾個獎項，將於本月17日頒發畀交易量多嘅券商，下星期仲有個比拼交易量嘅比賽，到時公佈埋賽果，不過全部冇獎金、冇獎品，只得獎座。
下星期（9至13日）舉行嘅「一周年交易比賽」，主要獎勵滬股通（北向）成交量相對最多嘅3名券商，聽落似係想人為谷大成交，但聞說證監會已睇過比賽細節，港交所應該唔會被人將軍。
獎項方面就包括「滬港通最活躍經紀商大獎」、「最高參與滬港通交易大獎」、「最多特別獨立戶口參與大獎」，港交所有晒券商嘅交易紀錄，到時就知邊啲券商活躍於滬港通，另外仲有個「滬港通投資者教育網站大獎」㖭。