有傳媒噚日報道，最近是非多多嘅東亞銀行副主席兼香港大學校務委員會成員、70歲嘅李國章爆出「父女戀」，同喺dbc數碼電台任職市場推廣部主管嘅一名女子相戀，報道指該女子名叫Monique Ho（何婷媚），年約40歲。
雖則被傳媒爆出「父女戀」，但李國章似乎冇受影響，噚晚7點10分左右，李國章不避嫌咁駕車直駛入dbc位於灣仔告士打道3號嘅大廈停車場；唔夠兩分鐘，佢已經接咗女伴上車，女伴穿住黑色喱士上衣，明顯十分避忌，一直耷低頭，而佢髮型同體形，同報道中嘅Monique極為相似，都幾有可能係同一個人。
太太逝世兩年
李國章接載女伴時就明顯十分緊張，連車頭燈都冇開，就直駛上中環半山雅賓利道1號寓所，未入門口，員工已打開門迎接李國章，之後兩人就一直未有再現身。
其實李國章嘅外籍太太Diana Chester喺2013年逝世，事隔兩年，佢似乎已經放下傷痛，同Monique擦出愛火。據聞dbc內部早已流傳佢哋撻着，有員工仲話Monique主管嘅部門冇受裁員潮影響，唔通有李國章照住係唔同啲？
李八方
mailto:[email protected]
