嚟緊呢輪英超有北倫敦打吡，阿仙奴大戰熱刺，講起兵工廠，佢哋今季條防線真係好穩，牽牛兄想讚吓比利連呢個後生仔，小弟好大路咁覺得施治（圖）好堅，呢個收購對防線有立竿見影嘅作用。
一個世界級球員，可以改變一隊波嘅氣質。阿仙奴前兩季買咗奧斯爾同阿歷斯山齊士返嚟，進攻線已經有板有眼。今季買埋施治之後，條防線終於有個世界級人馬，整體質素高過上季一班。睇一個數據就知道， 阿仙奴喺12/13球季英超場均失球為0.97球，前季就1.08球，上季有0.95球，至於今季暫時只係場均失0.73球！
比較多一個數據，就知施治嘅重要。比較阿仙奴近四季平均被射門嘅數字，今季係10.5次，上季係10.7次，前季最多係11.9次，而12/13球季10.6次，除咗前季之外，其他三季嘅數字差唔多。被射數字差唔多，但失球少咗，原因包括施治好勁，救咗好多波。施治今季場均撲救2.64次，係近季撲救最多嘅阿仙奴門將，上季嘅奧斯賓拿都係得1.95次，而施捷斯尼就更少。
由施治以至奧斯爾同山齊士嘅例子可以講畀我哋聽，當一支球隊有好多一流球員，但成績硬係唔上唔落時，應該點算好？唔係換過批球員，而係集中火力，爭取一個世界級球員加盟。呢番話講緊畀邊隊聽？當然係熱刺啦，精打細算嘅利維好心學吓雲格，哺住啲豪門棄將，幫𠵱家班球員搵個領袖返嚟啦。
文：咖喱