【巴黎專訪】明年便入行20年的梁詠琪，在觀眾見證下成長，今年2月升格做人母，生活徹底改變，萬事以愛女Sofia為先，為餵哺母乳，現時拒出埠工作超過三日。這次遠赴巴黎開工，索性貼身帶着囡囡，工作前後回老公家鄉西班牙探親，結婚四周年慶祝從簡，吃餐飯、規劃未來已夠浪漫。梁詠琪在巴黎受訪時，坦言早就計劃完成明年的入行廿載企劃後再造人，誓要「嗱嗱聲再嚟多個。」
統籌：林妙萍
撰文：林嘉慈
攝影：葉君海
化妝：Circle Cheung of ndnco.co
髮型：Ziv.Y of pi4.com.hk
榮升媽咪的梁詠琪（GiGi），生活、話題離不開愛女，上月去巴黎時裝周的工作檔期，夾在首次帶囡囡回西班牙探爺爺嫲嫲的行程中間，於是一家三口由當地飛到巴黎，方便餵人奶，又不會錯過女兒的成長片段。講起B女搭飛機，GiGi一臉心痛，「嚟到歐洲太乾燥，佢個鼻唔舒服，皮膚又好乾，佢有啲唔舒服就會瞓，食得唔係幾好，維持咗幾日，同埋第一次搭長途機，我同老公輪住湊佢，每人瞓得兩個鐘咋。」
結婚四年 熱情&窩心
囡囡大過天，連上月結婚四周年都不用特別慶祝，見到老公Sergio親親這個小甜心，已是最好禮物，「我哋覺得每日一齊，有時好簡單咁食餐飯，計劃未來，傾下呢幾年嘅感受，其實都好romantic。」夫妻經過長年累月相處，熱情難免減退，GiGi有個西班牙籍老公，卻完全冇有怕，「西班牙人好熱情，佢哋個啲熱情係你㩒都㩒唔住，我先生係鍾意講啲好鼓勵大家嘅說話，或者增進感情嘅說話，又唔係用甜言蜜語去講，因為嗰啲係真心嘅說話。」
兩公婆互相讚美、多謝，共同面對任何問題，「湊小朋友嘅工作係攰，一定有所犧牲，體力上大家都面對過眼瞓到頂點嘅時候，都係靠互相支持撐落去。」四年過後，彼此更真心真誠地溝通，直接抒發感受，「湊女當然有時會有意見分歧嘅時候，我哋嘅處理係會討論，雙方睇下好處、壞處係點，另一個做法又點，再得出結論，唔會嗌交，我哋覺得嗌交唔係解決問題嘅方法，反而好平心靜氣咁討論。」囡囡沒有分薄老公對GiGi的愛，反而讓她見到老公盡心照顧自己的一面，生多個都不成問題，「如果我體力OK嘅話，我哋有計劃，希望下年主力喺工作上面，譬如唱片同騷，搞完之後會嗱嗱聲再嚟多個。」
入行廿載 激動VS激氣
模特兒出身，唱作、電影雙線發展，轉眼明年出道20年，最開心莫過於有粉絲支持，「喺演唱會舞台上，凝聚咗大家支持嘅力量，每次係最開心，最enjoy。」挫折難免，藝人最忌被曲解、被負評，避無可避，「遇到啲新聞令我好激氣，我都唔係咁，點解寫到我咁？呢啲激氣嘢，人人都試過，我都唔例外，最緊要睇自己點面對，唔好focus喺呢啲唔真實嘅報道、傷害你嘅說話、負面情緒上，反而你咪向前行，唔好理佢。」翻查資料，GiGi當年捲入鄭伊健三角戀疑雲最轟動，被指孤獨精、迫婚不遂、外籍圈外人戀事……新聞多多，究竟哪個報道最觸動神經？GiGi卻通通認為不值一提，最重要move on！「總之每件事發生都有佢嘅原因，係有嘢要你學，學咗咪向前行，咁一定更加好，如果你成日望轉頭，問點解會咁，就走唔出困難，係唔會有更好，所以發生嘅嘢係會過去的，係冇問題。」
工作方面不斷前行，今年首度挑戰製作人，參與台灣電影《泡沫之夏》，「坐低要同大家做決定，令你更深入去諗角色着嘅衫、佈景，一事一物都影響建立人物嘅立體性，係之前冇涉獵過嘅範圍。」不是刻意轉型，一試又覺得好玩，最正是開工不用執到正，「routine每日起身就係化妝梳頭都好攰，有時嚟下啲變化，今日出嚟牛記笠記就得喇，又幾開心。」
做怪獸家長？
香港教育問題特別多，近期全港媽咪討論TSA議題，「贏在起跑線」理念造就怪獸家長的出現，BB未出世就準備一條龍升學計劃，媽咪、仔女都辛苦。GiGi早聽過身邊媽咪級朋友的辛酸，BB未戒奶已經找幼稚園，GiGi有否受感染，為八個月大的Sofia報學前班、幼稚園？她說：「未話搵playgroup，我哋都覺得等佢差唔多歲幾、兩歲，睇情況先決定幾歲去playgroup、讀幼稚園。」暫時着重家庭教育，「當然𠵱家喺屋企玩多啲，啟發佢腦部發展係重要。」
更多精采時尚內容，盡在 http://add.appledaily.com 。