國際大鱷索羅斯明剃「債王」格羅斯（Bill Gross）眼眉！最近有消息話，索羅斯喺債王管理嘅基金贖回近5億美元（39億港元），而筆錢就係舊年債王跳槽嘅時候，索羅斯為咗表示支持而投資。唔少人都認為索羅斯咁樣攞番筆錢，擺到明信唔過債王。
索羅斯信唔過債王並非空穴來風，因債王近年頻頻老貓燒鬚睇錯市，淨係睇佢舊年跳槽到駿利資產管理（Janus Capital Group）之後成立嘅全球無約束債券策略基金，今年已經跌咗1.4%，跑輸同行。呢個基金總值14億美元，其實有一半都係債王自己嘅錢，所以索羅斯褪軚都唔係冇原因。
債王上月仲入紙告前老闆太平洋投資管理公司（Pimco），指對方唔合理炒佢，令佢聲譽受損，𠵱家索羅斯好似用另一種方法落佢面，唔知債王傷唔傷心呢？