黃成智離開民主黨後，同另一位前黨友狄志遠搞咗個要走第三條路嘅參政組織「新思維」，佢自己任副召集人。
估唔到做咗冇耐真係有咗新嘅思維，事緣佢噚日現身民建聯主辦嘅研討會（圖左），話希望民建聯可以執政，聽到在場人士擘大個口得個窿！
黃成智喺研討會中先呼籲社會要和諧，其後點出目前政府嘅問題係無政黨政治，令好多工作不能延續，繼而話，希望將來民建聯可以執政，因為想令大家有政策上嘅競爭喎。
身為新思維召集人嘅狄志遠，就喺接受傳媒訪問時透露，佢哋設定籌款目標係三百萬元，𠵱家已經籌咗近半、即係百幾萬啦，成績尚算滿意，明年1月7日會舉行籌款晚宴，為立法會選舉儲定銀彈。