此日到FCC吃午飯完畢，離開時見到在樓梯旁邊有兩大袋罌粟花（紙花）任攞，旁邊就有一個籌款箱，有說明係為香港退伍軍人協會籌款嘅，於是放張20蚊紙入去，攞番一朵花。
每年十月，大家睇英超轉播就會見到各球隊嘅球員在西裝袋戴上一朵罌粟花，小時候左丁山記得每年十月，父親每日返工都戴上呢朵花，佢在中電工作，大概係西化一啲，跟隨英國人習慣啩，不過佢在日軍侵佔香港前，曾是甚麼後備華人防空隊人員，因日軍來得太快，佢地在英國人上司勸喻之下，成班華人好快就除下制服，返回社區，英國人就被捉入赤柱，亦因此而有戰後丁山出世。先父對呢啲事一直不願多談，總之每年十月就戴上罌粟花。
由雪廠街行落大道中，碰到一位相熟朋友，佢對左丁山喝一聲：「郵筒都要遮住皇冠咯，乜你戴住朵紅花咁殖民地化？」左丁山知道佢係開玩笑，但隨即想起，係噃：十月戴紅花，今天似乎只係居港英國人習慣，本地人係好少戴花嘅啫。返到公司，呢位老友已傳嚟林行止嘅大文：「虞美人不是罌粟花」，林先生可講係本港之英國典故考據專家，乜嘢逸事落在佢手中，都可以寫到出神入化，妙趣橫生。讀完佢篇大作，先知道罌粟花係錯誤嘅，「國殤紀念日」（Remembrance Day）人們所佩戴嘅花嘅正確名稱係「虞美人花」（Papaver rhoeas），與罌粟花同屬不同種，於是又上了一課。原來以前北京中央大員亦誤會咗，認為英國人到北京訪問，個個戴上紅花，認為罌粟花會引起鴉片戰爭之痛苦回憶，英國佬有意攞景，後來不知通過甚麼渠道解釋，中方先至釋懷，算數，故此今次習近平訪問英國，卡梅倫等人照樣佩戴紅花迎賓，中方人員仍然鬼咁friendly。有此文為證，左丁山立即打電話俾呢位朋友，預備說明講清楚；朋友話：「我老早就知啦，傳真林行止篇文俾你，係驚你無知咋！」唔，通識教育係差少少，抵俾人窒。返到屋企，又俾家人問及點解戴罌粟花，於是又解釋一輪，順便講埋家族歷史，一講就知道好多事情無文字紀錄，日後勢必湮沒無聞，但七十幾年來時勢轉變得快，普通家庭邊度有閒情為家族講家族史吖！