國家主席習近平早排先至去完英國進行國事訪問，轉吓頭就輪到中美交流！
八方講緊嘅係美國駐港總領事夏千福咋！早排話香港要「去殖化」嘅全國港澳研究會會長陳佐洱，原來日前喺北京同千福BB見面（圖）。
如果唔係全國港澳研究會喺網頁公佈，大家都唔知，陳佐洱原來唔介意「勾結」外國勢力喎。研究會網頁話呀，陳佐洱同夏千福就住香港當前形勢，同香港未來嘅發展方向進行交流；睇見佢哋言談甚歡嘅會面相，相信佢哋都幾啱傾。
美國駐港領事館回應傳媒查詢時就話，千福BB稍後仲會同處理港澳事務嘅內地高官交流，但冇透露具體詳情，乜事搞到咁密實先？