英超周一就上演獨腳戲，熱刺主場以3:1擊敗阿士東維拉，最開心係邊個？領隊普捷天奴？入波功臣迪比利、哈利卡尼等？可能係呢場執法嘅球證甸恩，迪比利先開紀錄時，俾電視台影到甸恩振臂歡呼，心水清嘅球迷都搵到佢以前執法熱刺比賽期間嘅慶祝片，斷到咁正，想唔認係熱刺球迷都唔得。
熱刺主場出擊，三分鐘就由迪比利左路突破窄位建功，幫球隊先開紀錄，甸恩就好似主隊球員咁高舉雙手慶祝，爭啲想同球員擁抱咁滯。熱刺之後再憑迪利阿里及哈利卡尼各建一功，3:1擊敗由佐敦阿休破蛋嘅維拉。
甸恩今季吹死阿仙奴
甸恩係熱刺球迷都好似係公開秘密，之前試過吹熱刺時，愛隊入波都忘形慶祝；今季阿仙奴作客車路士一戰，就係甸恩執法，熱刺世仇係阿仙奴，結果兵工廠輸0:2之餘，仲有基比爾包列斯達同辛迪卡索拉領紅牌，反而車仔前鋒迪亞高哥斯達嘅惡行就走甩，難怪領隊雲格話以後唔希望甸恩再主吹阿仙奴比賽。
維拉聯賽七連敗，仲排英超榜尾，賽後就正式公佈由前里昂教練加迪接任領隊，仲簽約四年。不過官網就樣衰啲，上載歡迎加迪嘅相中，竟然串錯加迪個名Remi做Remy。