特首梁振英同財政司司長曾俊華近日陸續約見各政黨，為來年新一份施政報告同財政預算案聽意見，噚日輪到見自由黨同新民黨。不時狙擊CY嘅自由黨榮譽主席田北俊，喺會面期間繼續正面抽擊，話政府要改善同泛民關係，先可以令立法會開會更有效率，更直指「官員」以筆名喺報章撰文回應議員說話只會令政府失分，要回應就唔該實名撰文唔好龜縮咁話！
田少講緊邊個？呼之欲出啦。之前新聞統籌專員馮煒光被田少踢爆常以「金鐘仁」筆名撰文為政府護航，冇幾耐又有人以「政壇高人」名義批評自由黨喺內會改選副主席時「倒戈」，田少事後又喺fb篤爆：「金鍾（鐘）仁，唔好以為改咗個名就無人認得係你。」但八方相信，以後「金鐘仁」匿名撰文嘅情況會減少，皆因佢名正言順攞近廿萬高薪玩fb，掛住幫超然老細上載調理農務照片，睇怕再冇咁多時間撰文搞批鬥。
葉劉自稱同CY關係好
對於田少倡議梁班子同立法會保持良好關係，緊接同CY會面嘅新民黨就自言同CY關係好好喎。黨主席葉劉淑儀指田少以前係行會成員、𠵱家唔係，可能因此覺得同特首疏遠咗；至於改善行政立法關係，佢話係雙方責任，好似特首出席立法會，議員都應該尊重。即將見CY嘅民主黨就預告，會當面要求對方將《防止賄賂條例》第3及8條擴展至適用於特首，明顯衝住對方收取澳洲公司UGL一事追數。
李八方
mailto:[email protected]