政商界中人經常將「一帶一路」掛喺口邊，講到天上有地下無，估唔到連律政司司長袁國強（圖）訪問美國，都可以講到「一帶一路」。
身在美國華盛頓嘅袁國強喺喬治城大學法律中心致辭時話喎，考慮到亞太區嘅經濟發展以及「一帶一路」帶嚟嘅影響，對國際法律及解決爭議服務嘅需求，將毫無疑問與日俱增，認為喺咁嘅情況下，香港要提升同鞏固作為亞太區國際法律及解決爭議中心嘅角色喎，仲話根據倫敦瑪麗皇后學院發放嘅2015年國際仲裁調查報告，香港特區獲評為全球首選仲裁地點嘅第三位，僅次於倫敦同巴黎。
除咗喺喬治城大學法律中心致辭，袁國強此行亦喺一個海牙公約會議發表主題演說，分享國際司法嘅實施經驗，亦同中國駐美國大使館公使李克新會面。