張智霖（Chilam）同袁詠儀養咗一隻貴婦狗叫阿金，隻狗主要係個仔慕童（魔童）想養，所以佢兩公婆就買嚟送畀個仔。原本魔童答應會好好照顧，但結果阿金仲係Chilam照顧得比較多。
日前Chilam同佘詩曼接受傳媒訪問，兩個人對談講起家中狗狗，Chilam竟然話狗狗成日喺屋企屙尿，仲話諗住拎去人道毀滅，呢兩日喺fb引嚟好多愛狗人士聲討話：「啱啱睇到報紙，自認靚仔嘅張智霖話準備帶屋企隻狗狗去人道漽滅！真係火都嚟埋！！大家幫忙傳出去，一傳十，十傳百，如果佢唔要狗狗，大把人要，做乜要將佢人道漽滅！仲要話狗狗係乖！！！」
「咁冇幽默感」
馮仁昭知道Chilam一向好錫阿金，而阿金每次見到佢返屋企就會好熱情想俾佢抱，所以聽到佢話要人道毀滅愛犬，唔係咁相信，噚日打畀佢問吓搞乜鬼，佢話：「講笑咋，好似打比喻，有時我個仔好曳，都想鍊死佢，唔通真係鍊死佢咩？點解啲人咁冇幽默感，我不知道幾錫啲寵物，以前有養貓、狗、龜，我同隻狗都好好感情，我屋企大家都一家都好錫佢，有時佢真係好頑皮，所以講吓笑，冇諗過啲人咁敏感咁認真，放心，隻狗冇事，我哋一家人都好錫佢。」
撰文：馮仁昭
