講到本港上市公司管理層嘅衣着，大部份都係西裝、套裝，就算科技電訊公司唔想咁formal，管理層多數都係恤衫、西褲。
「再上市」嘅香港寬頻（1310）噚日舉行首次年度業績會，行政總裁楊主光（威哥）與財務總裁黎汝傑（阿Ni）出場，大家竟然都係牛仔褲襯波鞋，威哥一件白T加黑色西裝褸，阿Ni就連西裝褸都唔着，簡單一件黑色V領T恤上陣，唔講仲以為身處時裝公司業績會。
威哥與阿Ni當然唔係冇時間買衫先至咁着，聞說，佢哋想要打破傳統，塑造一個跟對手唔同嘅形象喎。話就話好似好簡約，但威哥與阿Ni噚日呢身簡約look都唔係咁易carry，肚腩大啲都唔掂。