近期有邊四粒字，會令建制中人豎起耳仔細心聽？嗱嗱嗱，咪以為花生友曳曳講埋啲衰嘢，講出嚟真係正經到嚇親大家，就係「一帶一路」嘞！皆因呢個係阿爺落柯打要做嘅國策，建制派梗係一窩蜂拍晒馬屁咁去跟從，政府唱好、組織搭台，總之就講到商機無限，但有心水清建制中人卻話，如果真係細心了解，就知道一帶一路好政治化，民間其實幫到手幾多？花生友發現，上周四可謂特區一帶一路日。先係特首梁振英喺一帶一路論壇提到，香港有多方面優勢，可以為一帶一路帶嚟貢獻；財爺曾俊華則喺出席絲綢之路研討會後話，一帶一路為全球帶來新動力。
與此同時呢，商務及經濟發展局局長蘇錦樑亦喺立法會話呀，推動一帶一路會帶來商機㗎，最終立法會通過咗把握一帶一路、尋找經濟新方向嘅無約束力議案。總之就係泛民以外，全民大合奏，彷彿一帶一路就係靈丹妙藥，食咗就會起死回生。
到底係咪呢？唔使擦鞋嘅泛民就比較心水清，話中國唔通真係好可以靠講吓要推動一帶一路，就可以成為最強國家經濟不倒？有建制派中人亦話呀，其實一帶一路牽涉國際間嘅政治角力，唔係咁易成事，佢話見到官員一面倒吹噓，覺得佢哋根本低估咗難度，好似純粹自high，而幫手搭台嘅人提起呢四粒字就亢奮，真係令佢巧驚驚，到底係真唔知定唔想知，呢壇嘢阿爺都好有其他目的？如果真係唔知，咁就咪誤以為佢哋真係幫到手咯。
花生友
周二、四刊出