係人都鍾意睇靚嘢，如果你嗰區嘅區議會候選人係靚女，關注度肯定大大提高！
南區海怡西選區呢次就有港姐出身嘅人民力量主席袁彌明披甲，同現任區議員新民黨陳家珮決一死戰，據聞兩位35歲嘅美少婦鬥得難分難解，拉票更加各出奇招，用盡方法吸睛又吸票。
陳家珮萬聖節扮天使
有街坊話見過袁彌明夫妻檔現身，同老公林雨陽孖住出巡好鬼sweet，袁彌明亦喺facebook貼過依偎另一半嘅相，留言「這樣拉票最幸福，今晚都係開late shift晚站」，圖文並茂閃爆選民。
陳家珮則喺萬聖節落場大變身，當晚開街站嘅佢，特別戴住一對白色翼，乜佢想飛往天上咩？佢話係想藉此寓意，要繼續做愛護海怡嘅天使。